Ang paghigugma
Daw pagsagod ka Rosas
Indi mo pwidi dalidaliun
Kinahanglan
Malawid nga pasinsya
Kinahanglan
Adlaw-adlaw nga bunyagan
Sa kaagahun man ukon sa sirum
Magsag-a kaw ka duro nga tubig sa bubon
Butaa ang surudlan nga galon
Kag ang mga Rosas sa ugsadan
Ahuga it masunson
Hay sa kabuhayun ang imo kapisan
Mabalusan ka daragkul nga butkun
Nga sa soltiro maambung turukun.

Tuuya it mayad ang pagpamunyag
Para malab-ot ka tubig
Mga pinakadalum nga gamot
Para imo matandug
Ana baratyagun nga namarhan
Kon kis-a mas mayad
Nga kalihun mo ang lupa
Sa palibot ka tanum nga Rosas
Para makaparanupsup ang tubig
Kag ang pagbahul magadasig

Kon kis-a
Kinahanglan ka distansya
Para makaginhawa kag may kahidlaw nga mapatunga

Hambal pa gid ka mga mal-am
Makigsugidanun sa mga tanum
Hay kuno mangin madasig
Ang anda pagbahul
Parihas man sa mga matam-is nga tinaga halin sa soltiro
Nga ka sangka daraga ginapangita

Sa urihi
Sa wara untat nga pagpanikasug
Sa mabuhay nga paghinulat kag pasinsya
Magapamukad ang Rosas
Magapamuskad ka tampad nga paghigugma
Pagakuhapun mo bilang soltiro
Kag angkunun una na nga mga duga.

Sa akun paranawun sa katalunan
Maraku it kasablagan
Nga kanakun nagpangatubang
May kasiuk nga makadurugi
May haron nga makataralang
Pay sa pagkabulag sa dalan
Sa kakapoy sa kataragman
Nagtuhaw ang imo limug
Nga kanakun nagpanabang
Sa mga nabilin nga purus
Ginsundan ko ang imo pagragasa
Asta akun nakita
Ang kasanag sa iraya
Sa punta nga parti ka mga daragkul nga bato
Dyan kaw
Hublas nga nagadalagan sa biak nga lupa
Ang imo agsik nga ginapanggasan ka sirak ka adlaw
Ang nangin brilyanti sa akun mga mata
Sa sara ka pagmisuk
Naglukso kaw sa makaharawa nga banglid
Nagbuyung sa asul nga linaw
Nga nagaparanaming sa langit
Nalumay takun sa imo tumalagsahun nga katahum
Dalidali ako nga nagparapit sa imo pag-ilig
Nagsarok sa musika ka imo limug
Dayon mo ginpun-an ang akun namarhan nga tubug
Sa nagaharahara nga baratyagun
Gin-uba ko ang akun bayo kag pantalon
Kag magtusmog sa imo dughan
Gin-anod mo ang akun kakapoy kag kamingaw
Ginlingaw mo takun sa imo dara nga himaya
Ginbaruron mo ang akun kalag
Sa masulug nga pagragasa
Padulong sa mariit nga kaidaluman ka pusod ka talon
Asta nga
Di run takun kabutwa.