Ginatao kanimo tanan nga ginasakup ka akun ngaran
Pati dignidad nga ginaandaman isakripisyo
Asta rispito sa akun kaugalingan ginbuy-an
Nga bisan ako ginaliwanliwan patay ka hani ka mga tawo
Nga bisan ako pangarwa lamang sa imo tagipusuon
Nga sa sulud ka sangka oras lang nga pwidi mo itao,
Kabuhi ko imo ginakumplito
Ano gid bala ang sala sa pagpalangga
Kon ang ginapalangga mo may ginapalangga man nga iba?
Ano gid ang kasakit sa mga tinaga nga akun mabatian
Kon sa sulud ka sangka oras ikaw man akun maharkan?
Ano gid bala ang pamatyag
Kon makita kaw kaimaw ka imo tuod nga asawa?
Pagkatapos ka baynti tris oras ko nga paghulat
Asta imo balikan kag itao sangka oras nga ginapangayo
Sa kwarto nga kita lang nakamaan.

Nagadalagan, nagalagsanay ang huni ka akun tagipusuon
Hunahuna ko nagalibot, nagasagap ka sabat
Nagaparikparik sa pagpaminsar ka mga posibilidad
Ginabasol ang hangin sa paghani ka sala nga mga pinili
Kag nagguyod kanakun sa madulum nga mga inadlaw

Ginatakus ko sa akun likod lima ka sako nga pag-abiabi
Pagpati nga sa akun pagpanaw,
Makita ang yabi nga magabukas ka aragyan
Nga magatudo ka sakto nga diriksyon
Paagto sa akun ginadaradamgo nga mga handum

Piro ang langit nagapatimaan nga mahibi
Kaimaw ka daguub pirit ako ginakupkupan sa kahadluk
Nga ako anudon ka tubig pabalik
sa lugar nga gin-umpisahan
Piro kanta ka daguub ako ginlaygayan:

“Padayon.”