Halin sa Baul: Ang Pulitiko sa Gobyirno
ni Rev. Fr. Jose Glicerio C. Geremia
Pinili kag ginkay-ad ni Maria Milagros C. Geremia-Lachica
1. Sin-o ang Masarigan?
Ang pari nakabindita ka sangka klasrum nga ginpatindug ka sangka NGO. Nagdayaw ang pari hay kumplito ang mga pasilidad: may pinta pati ang mga siya kag may nasukbit pa nga wall clock sa dingding
Pagkalipas ang sangka simana, nagbindita liwan tana ka sangka klasrum pa gid nga ginpatindug ka LGU. Abaw makaluluoy gid: wara ti gawang, ang bintana linagis nga kawayan, santunga ang chalkboard kag wara napintahan.
Namangkot ang pari kay Mayor. Si Mayor nagsabat, “Gobyirno bay, Padre. Nagkulang badyit.”
2. Kamusta , Mayor?
Bantog si Monding sa andang banwa. Tubtub lang sa ikatlo nga grado ang anang pag-iskwila. Mayad sa pang-amigo kag nagdaug sa pagka-mayor. Pagkatapos ka sangka tuig sa anang pagpungko bilang mayor, may reporter sa radyo nga nag-interbyu kana.
Ang reporter namangkot, “Mayor, kamusta ang Peace and Order situation sa inyo banwa? May mga kaso man bala kamo kang Violence?” Ano mga plans mo, Mayor?
Nagsabat si Mayor, “Rugya, dipindi sa sitwasyon. Kon duro Fish, ti duro man Order, eh. Sa Violins tana, wara ti kamaan magtukar rugya. Gitara lang ang andang naman-an. Sa plants? Many trees kag laswa. Okey?”
3. Onto ang Kudkudan
Nangampanya si Mayor sa bukid imaw ka anang grupo. Marayu nga paranawun kag tam-an ka turokadun. Pag-abot sa baryo, naglibot sanda balaybalay sa pagpangamusta sa mga tawo samtang ang andang igma ginapriparar sa sangka balay.
Buhaybuhay, nag-igma ang grupo ni Mayor kag nagdayaw sanda sa manamit nga ginat-an nga dagmay nga ginhimus.
Ginaliwanliwan gid ni Mayor ang anang pagdayaw kag nalipay gid ang tagbalay nga nagakuon, “Mayor, pasensya lang. Midyo kidit lang gani kara ang anang gata hay duro ron bay bingaw kang akon onto.”
Daw masal-ukan si Mayor hay gali wara sanda ti kudkudan ka niyog.
4. Agwantaha
Panahon kang kampanyahanay, may sangka kandidato para Mayor nga nagsaka sa sangka balay. Ginhagad nga mangapi kag naobligar ang kandidato agud makapangilala. Nagmatomato timpla ka kapi si Mayor kag ginduholan kang muskobado nga kalamay. Nagsuk-ad ka darwa ka kutsarita si Mayor kag ginlugay sa kapi.
Pagkahigup na ka kapi, nagkuriit si Mayor nga nagapanagitlun. Gin-agwanta na lang ka tulun agud indi mahuy-an ang tagbalay, hay gali, taho nga luy-a ang ginsamo na sa anang kapi.
5. Pagkuru ka Dalan
“Cong, wara ka dangat ang karsada sa amun Barangay,” report ni Kap.
“Nugay run kamo ka riklamo. Importanti may karsada kamo,” sabat man ni congressman.
Dayon naghambal liwan si Kap, “Ti, salamat gid, Cong, sa imo ‘farm to pocket road,’ ay, farm to market road gali.”
- Katapusan -