Bulag kon Bulag
ni Danny S. Tabuyan
Matandus nga tawo si Peping kag konsehal sa baryo, nagaalagad nga boluntaryo kag wara ti ginabaton nga bayad ukon suhol. Tuman run kanana ang kilalahun ang anang pagpangalagad kag kalipay na ang magbulig sa anang isigkatawo. Tarahudon si Peping, piro may pagkatarso.
May buti ang tuo nga mata ni Peping, kag indi dya makakita. Tungud ka dya ginabansagan tana nga si Peping Bulag, piro wara nana dya ginapakasayud hay ginaako na gid man ang anang kasawayan, kag para kanana bukun dya sablag agud mangin normal ang anang pagkabuhi.
Ang andang pangabuhian imaw kang anang asawa amo ang pagpanguma kang andang sangka puna nga lupa nga parayan. May kaingud balay sanda nga mag-asawa nga sanday Enting kag Lupita nga mga manogbaligya kang mga laswahun kag matandus man nga mga tawo. Mayad gid ang rilasyon kang pamilya ni Enting sa pamilya ni Peping.
Sangka adlaw, nagsuay ang mag-asawa nga Enting kag Lupita. Tam-an gid ka init ang anda nga pagsabtanay nga naglambot sanda sa pagsinggitanay nga nakatawag kang igtalupangud kang andang iningud.
Nabatian man dya ni Peping, piro daw wara man sa anang bungug hay kuon na duna man tana sa mag-asawa ang magsuay. Ugaring, namarasmasan na nga daw bukun run ti kinaandan ang andang pagsabtanay, daw ka silik gid kang yaok ni Lupita kag nagatunog man ang limug ka laki. Nagalinagabung run ang dingding kang andang balay.
Nagparapit si Peping sa balay kang nagainaway nga mag-asawa kag magpuropanilag.
Tuga kang mainit nga pasinuay, naghambal ang nagahiribiun nga si Lupita, “Kon amo man lang ikaw karia, mabulagay lamang kita!”
Kag nagsabat man si Enting, “Ti, bulag, eh, kon bulag!”
Nagsaligbat man tana si Peping sa yawyawanay kang mag-asawa kag masinggitan, “Wanhaw kon bulag kamo ang nagapakaun hay?!”
Nagturukay lamang ang mag-asawa kag mag-uruk-uk sanda nga darwa ka kadlaw.
Wara matabo ang andang pagbulagay.
- Katapusan -