Halin sa Baul: Ang Pari kag ang Parokya
ni Rev. Fr. Jose Glicerio C. Geremia
Pinili kag ginkay-ad ni Maria Milagros C. Geremia-Lachica
1. “Audience Participation”
Kon Byirnes Santo, ginabasa ang Pasyon. Agud nga indi matuyo ang mga tawo sa malawid nga pagbasa, ginpaagi dya ka pari sa sangka drama imaw ang mga apostoles kag may “audience participation.”
Kang nag-abot run ang istorya sa pagsinggit ka mga Hudiyo nga ilansang si Hesus, may nagtindug kag nagakumpasan nga nagsinggit halin sa mga manugsimba, “Ilansang sa krus!”
Nahangyus ang ingud na nga asawa kag dara hawid sa anang bana, “Ay, Paking, pungko. Wara timo gaintra dyan.”
Wara kamaan ang asawa nga ginsikrito gali kang pari si Paking nga imaw tana sa “audience participation.”
2. Sin-o ang may Luyag?
Ang pari nag-interbyu ka karasalun kag nagpamangkot, “Wanhaw mapakasal kamo?”
Nagsabat ang nobya, “Padre, gusto gid ni Nanay.”
Ang nobyo nagsabat man sa pari, “Padre, amo man dya luyag gid ni Tatay.”
Ang pari naghambal, “Ang inyong Nanay kag Tatay amo gali ang may gusto, ti sanda akun kaslun, bukut kamo!”
3. Sa Sunod pa Atun
Sabado nga adlaw kag saku ang skidyul sa simbahan. Nagapasunod ang mga misa sa patay kag sa una nga misa, may nagpundo nga awto sa gwa.
Nakita kang pari ang pagdalidali sulud ka sangka bayi kag nagparapit sa lungon nga nagahiribiun. Hinali nakabalikid ang bayi sa kilid kag daw nagtingala. Wara gid tana ti kilala.
Dalidali ginkablit tana ka anang imaw kag ginkun-an, “Ay, maan, sa sunod pa gali ang atun.”
4. Sagad Magpadihot
Adlaw nga Domingo kag si Santino lang ang nag-abot nga magsakristan sa pari. Naglibug anang ulo hay dapat may makaput ka insinsaryo kag lain man ang makilingkiling ka lingganay.
Pag-abot sa konsagrasyon wara mag-ikspiktar ang pari ka himuon ni Santino.
Ana gintakud ang lingganay sa anang kahig kag samtang nagainsinsaryo tana, ginpalakpalak na ang anang kahig nga may nagatakud nga lingganay.
5. Gahulat pa Ako
Gindapit ni Jing nga magsimba ang anang hinablus nga mga apat ka tuig anang idad.
Nagkuon si Jing, “Dali simba kita hay kar-on mabalik si Hesus nga nabanhaw.”
Duro ang nagsimba sa banwa kag nagtalangay run sanda. Nagsarig si Jing nga nakatawas run mag-uli si Bongbong sa anang Nanay piro pag-abot sa balay wara tana rugto. Nagbalik sanda sa simbahan kag rugto gali si Bongbong nagapungko gihapon sa una nga bangko.
Namangkot tana, “Ay, Bong, dyan kaw gihapon?”
Nagsabat si Bongbong, “Gahulat pa ako. Wara pa mabanhaw si Hesus.”
- Katapusan -