<![CDATA[DUNGUG KINARAY-A INC. - Tay Tama run ra nga Pamulang]]>Sat, 04 Nov 2023 13:10:31 -0400Weebly<![CDATA[Nanay Ko, Maistra]]>Fri, 20 Feb 2015 01:18:40 GMThttp://dungugkinaray-a.com/tay-tama-run-ra-nga-pamulang/nanay-ko-maistra
Picture
Himo ni Katie Berggren halin sa http://kmberggren.com/tag/mother-child-art/


Nanay Ko, Maistra
ni Erma Jane A. Otayde


Ano gid man bala kabudlay kabuhi kang maistra
Wara pa gasirak adlaw gabantay run sa karsada
Hay basi maurihi sa klasi, rayu pa bi ang distansiya
“Nay, nay, hambal ni Mam madara kami kano basura"
Sa pag-agi ka traysikel, si Nanay wara nagpara
Hay ang akun luyag unahon na kaysa sa ana
Amo ra ang Nanay ko, didikado nga maistra

Sa pag-abot na sa balay kon hapon
Mahimus pa gid tana ka panyapon
Matig-ang, manilhig, mga saprat ginapanipon
Tapos kaun, tana gahugas pinggan para kami makatuon
Ginawad-an oras maglantaw ka tilibisyon
Hay planuhon na run ang sunod adlaw nga liksyon
Amo ra ang Nanay ko, maistra kag sangka inspirasyon

Ang maistra duro bata, sa sulud balay maskin sagwa
Piro andut ang oras nanda, wara gakadura?
Hay ang pagtudlo nagbuut sa pagplangga
Bukut lang kuon para makakwarta kag may obra
Kon  may klasi gani, si Nanay kis-a ko lang makita
Oki lang kanakun, man-an ko nga tana sadya
Nanay ko, maistra. Bilib ako kana.
]]><![CDATA[Tay Tama run ra nga Pamulang]]>Wed, 31 Dec 2014 06:47:24 GMThttp://dungugkinaray-a.com/tay-tama-run-ra-nga-pamulang/tay-tama-run-ra-nga-pamulang
Picture
Himo ka George Howell Studios, Inc. halin sa http://www.georgehowellstudios.com/


Tay Tama run ra nga Pamulang
ni Erma Jane A. Otayde


Tukturuok kang manok akun nabugtawan
Aga pa ako nakakita ka urugtasan
Dalidali kapkap kang irislan
Hay akun pauliun si Tatay nga lagawan.

“Abi abata to si Tatay mo nga pag-un,”
“Naghimas lagi ka manok, wara pa kakaun,”
Pirmi ko mabatian kay Nanay, tak-an run takun
Mapati kaw run lang, kon hindi mo gusto lagsun.

“Tay, uli ta run ginasagap kaw run sa balay!”
“Una lang, masunod lang ko,” hambal ni Tatay
Ay, abaw! Namuti lang mata ko sa kabuhay!
Kuri siguro hay namag-o sa anang saklay.

Sa ana pag-abot, ako ginpabubod ka manok
Swirti lang kon indi manampok
Kon baslan mo man, ikaw pa ang lagtuk
Gaw-an, aram pa manok bisan bahul akun utok.

Kon ang manok, may ginatumar nga bitamina
Ako gamantinir ka sustansya halin sa laswa
Budlay man akuon, piro dapat may kompitinsya
Indi ko pasugot nga ang manok mas palangga.

“Ti, ano Tay? Manok run lang imo hulidun?”
Hambal ko kana kang ako nagsungon
Hay indi malikawan nga imo pamangkuton
Ang pagpalangga sa bata kag manok, pwidi tung-un?

May naghatud sa balay ka imbitasyon
Ang bulang, dungan kang pista pagahiwatun
Baka-baka si Tatay sa anang priparasyon
Bisan gasakit nga hawak, ana antuson.

Adlaw gabii, manok anang ginatubang
Kis-a run lang tana makita sa sala gabatang
Hay wara purusta, si Nanay ginsugo mangutang
Ginhambalan ko, “Tay tama run ra nga pamulang.”

Alas dosi run aga, si Tatay wara gihapon
Wara run kami naghulat, una kami yapon
Ako namulaw, hay si Tatay akun hulatun
Basi bay may dara pa to tana nga litson.

Batian ko ang huni kang traysikul rayu pa lang
“Ti, kampyon?” mangkot ko kana sa gawang
Ang nahambal na na lang hay, “Dugang akun piang.”
Kun-an kaw, Tay, mong “Tama run ra nga pamulang.”
]]>